سنتو ڀڳت: سنتو ڀڳت 1912ع ڌاري ڳوٺ ڇني، تعلقي جوهيءَ ۾ ڄائو. هي پنهنجي دؤر جو مشهور ڀڳت هو. سندس آواز به سريلو هوندو هو. ننڍپڻ کان ئي سندس لاڙو ڀڳتي طرف هو. هيءُ پندرهن سالن جو ٿيو ته سندس والدين ڇني مان لڏي حيدرآباد ۾ رهائش پذير ٿيا، جتي هيءُ گڏ رهڻ لڳو. هن پنهنجي دؤر جي وڏن ڀڳتن جي صحبت ۾ رهي ڀڳت وجهڻ جي سکيا ورتي. ٿوري عرصي ۾ فني مهارت سبب ڀڳتن جو مهندار سڏجڻ لڳو. کيس ٻيا ڀڳت گھڻي عزت ڏيندا هئا. حيدرآباد ۾ جتي به ست سنگ يا ڪا ٻي هندو مذهب جي محفل ٿيندي هئي ته سنتي ڀڳت کي خاص طور گھرايو ويندو هو. سنتو ڀڳت طبلي وڄائڻ جو به وڏو ماهر هو. کيس ناچ جي پڻ مهارت حاصل هئي. حيدرآباد توڙي ٻين علائقن جا ڪيترائي ماڻهو وٽس ناچ جي سکيا وٺندا هئا. پاڻ پيرسنيءَ ۾ سيٺ وشن داس جي وشن نگر (ڦليلي) ۾ رهيو ۽ اتي ئي وفات ڪيائين.